شرح ازاى تدرب فى صيدلية ... وازاى تقرأ الروشتة وانت واقف فى الصيدلية .. وهل الصيدلية تجارة وشطارة ولا علم وفن ؟؟؟

تدريب فى الصيدلية , كيفية التدريب فى الصيدلية , كيفية قراءة الروشتة , الصيدلية فن مش بس تجارة
شرح ازاى تدرب فى صيدلية

 كتير منا كصيدالة أو لسة بيدرسو فى الكلية لما نيجى نتدرب أو نشتغل فى صيدلية بنروح على طول نتعامل مع الزباين والروشتات واحنا لسه معندناش خبره كافية ..... ودا بيأدى اننا بنغلط كتير قدام الزبون مش بس كده  دا كمان ثقتنا فى نفسنا بتقل جدا  وبنحس اننا مش عارفين حاجة .... وفى النهاية بنكون عاملين زى البياعين بالظبت ... ودا اللى خلاهم يقولو علينا كده
علشان كده لازم نتعلم الأول اساسيات التدريب قبل العمل حتى نحصل على ثقة انفسنا اولا ثم الزبون ثانيا .............. 

أول حاجة   ان لازم يكون عندك ثقه فى نفسك وفى امكانياتك ومتخفش من الناس
ثانى حاجة  انك لازم تختار الصيدلية الصح اللى تدرب فيها  يعنى ايه ؟؟؟؟؟ يعنى الصيدلية اللى شغاله كويس والرجل ماشية فيها
طيب ليه ؟؟؟ لانك بكده هتتعلم بسرعه وكمان طالما الصيدلية شغاله كويس يبقى اكيد فيها معظم الادوية

ثالث حاجة  انك تقسم وقتك فى الصيدلية  بمعنى ايه انك يكون اكبر جزء من وقتك فى الصيدلية (( الوقت اللى صيدلية بتكون مش شغاله اوى فيه زى الصبح مثلا لحد العصر  ودا فى البداية بس لحد ما تاخد على الصيدلية وتبعد عن التعامل مع الزباين علشان ميحصلكش رهبه )فى انك تختار مجموعه معينة من الادوية وليكن مثلا المضادات الحيوة وتبدأ تراجع الكلام النظرى اللى كنت واخده فى الكلية ودا بيكون فى حدود ايام معدودة وبعد كده بنشوف مجموعه تانية زى البرد مثلا  ونبتدى نعمل فيها زى اللى عملناه فى المجموعه الاولى وهكذا  هتلاقى نفسك فى النهاية ثقتك فى نفسك بدأت تزيدوهتحس انك عندك معلومة فعلا ممكن تعامل بيها مع الناس 

بعد كده ممكن تروح فى الوقت اللى فيه شغل كتير علشان تبدأ تتعامل مع الزباين بس خليك خفيف فى البداية ومطولش

رابعا : لازم تدور على المعلومة بنفسك وتبحث سواء فى النت او الكتب ومتعتمدش اعتماد كلى على الدكتور الصيدلى اللى معاك
كلامه مش قرآن يعنى ومش كل معلوماته بتكون صحيحه 100%


خامسا ... يا سلام بقى لو بترتب الارفف بتاعت الادوية بنفسك ... شوف هتستفاد أد ايه .... جرب بنفسك وشوف خبرتك هتبقى عاملة ازاى سواء فى معرفة الادوية الموجود او حفظ شكل العلب او او ...

تعلم كيفية التعامل مع الروشتة ... 
 اولا وقبل ما ابدا اتكلم عن كيفية التعامل مع الروشته لازم اوضح نقطه مهمة جدا
واسمحولي اخليها هي عنوان الموضوع اللي هنتكلم فيه :

" انت مش وظيفتك انك تطلع الدوا اللي مكتوب في الروشتة وخلاص كده دورك انتهي "

لازم نعرف كلنا ان احنا كصيادلة ان وظيفتنا عند التعامل مع أي روشته اننا نشوف
وتكتشف أي اخطاء موجوده في الروشته وهل هناك أي تعارض بين الادويه المكتوبة ولا لا ؟؟
وهل الادويه المكتوبة تناسب الحاله اللي اتوصف ليها الدوا ولا لا ؟؟
ومن امثلة الاخطاء اللي ممكن تصادفك من خلال تعاملك مع الروشته والتي للاسف
ممكن يقع فيها الطبيب .. وصف لبوس شرجي لطفل عنده اسهال او وصف دواء شرب لمريض يعاني
من القيء :!: وطبعا لازم يكون الصيدلي فاهم الحاله كويس عشان ده دوره مش دور حد تاني


طيب لما تجيلي روشته وانا واقف في الصيدلية اتعامل معاها ازاي ؟؟ 

1-قراءة الروشته ككل لاستنباط الحاله
وده طبعا هيخليك تعمل تشخيص سريع للحاله وبالتالي ده هيساعدك انك تعرف نوع الدواء اللي مكتوب

2- قراءه تخصص الطبيب
وده من الحاجات المهمة لانها هتساعدك برده في التشخيص

3-معرفه عمر المريض ولو حتى بالتقريب ودا ممكن يساعدك لو مش متاكد من ال form بتاع الدواء كبسول او شراب
4-قراءه اسم المريض لمعرفة نوعه ذكر او انثى
وفي بعض الاحيان بيكون عمر المريض مكتوب في الروشته اما لو مكنش مكتوب فمن حقك انك تسال الشخص
اللي جايبلك الروشته عن عمر المريض ( ساعات طبعا بيكون المريض باعت حد يجيبله الدوا يعني مش لازم
اللي هيجيبلك الروشته هيكون هو المريض ) عشان تشوف هل التركيزات المكتوبه تناسب المريض ولا لا

5-قراءة تركيز الدواء المكتوب قراءة جيده
وللاسف ممكن الصيدلي يعرف يقرا الروشته كويس ويطلع الدوا المكتوب لكن يطلع تركيز تاني غير التركيز المطلوب
يعني مثلا مكتوب مضاد حيوي معين تركيزة 1 gm يقوم الصيدلي مياخدش باله ويطلع نفس المضاد الحيوي
ولكن بتركيز 250 mg وطبعا هيكون الدوا هنا ملوش أي تاثير .. اما لو العكس فممكن يعرض المريض لاضرار جانيه
نتيجه الجرعه الزياده وطبعا المريض مش ناقص كفايه اللي عنده

6--قراءه الجرعه المحدده من الطبيب والشكل الدوائى (اقراص -شراب-لبوس-----الخ)وطبعا بنلاقي
دكاترة كتير بيكتبوا اسم الدوا بخط كويس لكن للاسف الشديد بنلاقي جرعته الدوا والشكل الدوائي عبارة عن شخابيط !!
وطبعا لازم تستفسر من المريض عشان تعرف تحل الالغاز اللي جيالك في الروشته لان شكوي المريض مهمة جدا يعني مثلا مش معقول
مريض بيشتكي من الم في عينيه والدكتور هيديله لبوس :D

7- الاستعانه بالصيادلة الموجودين معاك في الصيدليه والاكبر منك سنا وخبرة للاستفسار عن حاجه معينة مش واضحه في الروشته

8- الاتصال بالطبيب فى حاله عدم التوصل لاسم الدواء :
وده طبعا الحل الاخير لو خلاص الروشته مش عارف تتصرف معاها ازاي خاصه ان فيه دكاترة خطهم بسم الله ماشاء الله ميتقراش نهائيا
ويفضل ان يكون اتصالك ده بعيدا عن المريض بقدر المستطاع حتي لا يتسرب الشك اليه او انك تحاول تقنع المريض ان اتصالك ده في
مصلحته للتاكد من الدواء المكتوب 


الصيدلة تجارة وشطارة ولا علم و فن ؟؟

معظم ما نسمع عنه اليوم من ممارسات الصيادلة يثبت أنهم يرونها تجارة و شطارة و الشاطر يكسب أكثر و كلما توفرت لديه مهارات التجارة كلما كان أفضل و استطاع أن يفتح أكثر من صيدلية و يحقق مكاسب مادية أكبر و هكذا..

و لكني شخصياً أري الأمر أكبر من ذلك بكثير, فالصيدلي الناجح يجب أن يعرف الكثير عن الأدوية و الأمراض و كذلك يجب أن يتعلم كيف يتواصل من المريض و الطبيب و الكثير من المهارات الأخري مثل البحث في الكتب و علي الإنترنت و كيفية صياغة المعلومات لتناسب القارئ الموجهة إليه و غيرها..

كما أنه يحتاج إلي التعلم المستمر و معرفة كل جديد في تخصصه و أن يكون لديه القدرات علي المداومة علي ذلك بدون كلل أو ملل.

لذا, فأنا أري الأمر أكبر بكثير مما يراه البعض

 .

التصنيفـات القسم الطبى